HOYCE TEMU ATISHIWA KUUAWA

 

 

MMOJA wa wajomba wa Miss Tanzania 1999, Hoyce Temu, Jacob Temu amekamatwa na Polisi kwa tuhuma za kumtishia maisha mlimbwende huyo. Tukio la kukamatwa kwa Jacob lilikuja baada ya kutishia kumuua kwa maneno Hoyce pamoja na shangazi yake ambaye ni Hilda Temu, katika mabishano ya wanaukoo juu ya sehemu ya kumzika ndugu yao, marehemu Emmanuel Nambuo Temu (33).

Miss Tanzania 1999, Hoyce Temu.

Hoyce aliliambia gazeti hili kuwa alitishiwa maisha kwa maneno wakati wa kikao cha wanaukoo kilichofanyika katika viwanja vya baa ya Rose Garden kujadili ni wapi pa kumzika marehemu Emmanuel, aliyefariki dunia jijini Dar Februari 16, 2014. Wakati baadhi ya wanafamilia na wosia wa marehemu wakitaka azikwe walipozikwa bibi na babu yake, Jacob alipinga hali iliyosababisha Hilda kufungua kesi katika Mahakama ya Wilaya ya Temeke. Jacob alikamatwa na polisi baada ya kufunguliwa jalada yenye kumbukumbu na OB/RB/3554/2O14 KUTISHIA KUUA ambapo kesi hiyo iko katika Kituo cha Polisi cha Oysterbay jijini Dar.
Katika kesi aliyoifungua Hilda na kusikilizwa hukumu kutolewa Jumatano iliyopita, Hakimu Mkazi wa Wilaya ya Temeke, Kassim Sapi Mkwawa aliamuru mwili wa Emmanuel uzikwe katika shamba la mjomba wa marehemu Dk. Mercezederc Nambuo Temu ambaye ni kiongozi wa ukoo katika Kijiji cha Kitahie, mkoani Kilimanjaro. Awali kesi hiyo ya madai namba saba ya mwaka 2014, ilifunguliwa mahakamani hapo na Hilda Lewi Nambuo Temu, ambaye ni mama mzazi wa marehemu, akitaka mazishi ya mwanaye Emmanuel yafanyike Kijiji cha Kitahie Old Moshi mkoani Kilimanjaro lakini Jacob alipinga. Hakimu Mkwawa wakati wa kutoa hukumu hiyo alisema:
“Baada ya kupitia maelezo ya pande zote mbili nimebaini kuwa pande zote mbili za ndugu wanachobishana si Kijiji cha Kitarara wala Kitahie bali hawataki marehemu azikwe kwenye shamba la ukoo. “Lakini kwa kuwa baba mkubwa wa marehemu Dk Mercezederc amekubali marehemu Emmanuel azikwe kando ya shamba lake lililopo Kitahie, hakuna aliyepoteza baina ya pande zote mbili, hivyo marehemu akazikwe hapo,” alisema hakimu na akasema gharama za kesi kila upande ujibebee. Kutokana na hukumu hiyo, marehemu Emmanuel anatarajiwa kuzikwa katika Kijiji cha Kitahie Old Moshi mkoani Kililimanjaro Machi 8, mwaka huu (leo), baada ya kukaa mochwari kwa siku 20.